नंदुरबार : प्रकाशा येथील निराधार वृद्धाला मिळालेली सानुग्रह अनुदानाची रक्कम चोरीस गेली म्हणून तातडीने पोलिसांनी त्या वृद्धाला मदत म्हणून 50 हजार रुपयांची रक्कम दिली होती. परंतु गरज असून सुद्धा प्रामाणिक वृद्धाने ती रक्कम खर्च केली नाही. तपासाअंती जेव्हा चोरीची आपली रक्कम परत मिळेल तेव्हाच ती आपली रक्कम वापरायची, असा निर्धार त्या वृद्धाने केला होता. दरम्यान जेव्हा चोरांना पोलिसांनी पकडले तेव्हा त्या चोरांनी देखील चोरलेली रक्कम खर्च केलेलीच नाही असे आढळून आले. धक्कादायक असे की या वृद्धाच्या मुलाला पॅरॅलिसिस चा अटॅक आल्यामुळे दोन दिवसापासून रुग्णालयात दाखल करण्यात आले आहे तरीही त्याने पोलिसांनी दिलेली रक्कम वापरली नाही. जिल्हा पोलीस अधीक्षक पी आर पाटील यांनी आज पत्रकार परिषद घेऊन माहिती दिली तेव्हा ही एका चोरीची अजब कहाणी सर्वांसमोर आली.
जिल्हा पोलीस अधीक्षक पी आर पाटील यांनी आज पत्रकार परिषदेत याची अधिक माहिती देताना सांगितले की, डोक्यावर पुष्पा शब्द कोरलेला तरुण संशयास्पद फिरताना आढळला होता व त्यानेच पैशांची थैली लांबवली असावी अशी माहिती या तपासादरम्यान मिळाली. पथकाने लगेचच अनेक सलून वाल्यांना भेटून अशी हेअर स्टाईल करणाऱ्या तरुणांची माहिती मिळवली. खेडोपाडी फिरून तपास केला. तेव्हा तळोदा तालुक्यातील छोटा धनपूर येथील विनोद उर्फ मिठू विरसिंग पवार हा 22 वर्षीय तरुण शेतात लपून बसलेला आढळला. त्याला पकडताच त्याने साथीदार राजू मोवाशे याची माहिती दिली. दोघांनी चोरी केलेली रक्कम परत केली. विशेष असे की आपण पकडले जाऊ या भीतीने या चोरांनी इतक्या दिवसात रुपयाही खर्च केला नव्हता.
ईकडे या वृद्धानेसुद्धा पोलिसांकडून मिळालेली मदतीची पन्नास हजार रुपयाची रक्कम खर्च न करता तशीच ठेवली होती. जिल्हा पोलीस अधीक्षक पी आर पाटील यांनी सांगितले की, वृद्धाच्या मुलाला पॅरालीसीस चा अटॅक आला असून दोन दिवसांपूर्वीच रुग्णालयात दाखल केले आहे. तरीही त्या बाबांनी आम्ही दिलेला रकमेला हात लावलेला नव्हता. असे असले तरी आम्ही मदत म्हणून दिलेली रक्कम खर्च करायला निराधार वृद्धास सांगितलेच आहे. शिवाय चोरांकडून जप्त केलेली रक्कमसुध्दा तुमचीच असल्याचे त्या वृद्धास सांगितले आहे. सदर कारवाई पोलीस अधीक्षक पी. आर. पाटील, अपर पोलीस अधीक्षक विजय पवार यांचे मार्गदर्शनाखाली रविंद्र कळमकर, पोलीस निरीक्षक स्थानिक गुन्हे शाखा, पोलीस हवालदार/ दीपक गोरे, पोलीस नाईक/ विकास कापुरे पोलीस शिपाई विजय ढिवरे यांचे पथकाने केली असून पोलीस अधीक्षक पी. आर. पाटील यांनी स्थानिक गुन्हे शाखेच्या पथकाला रोख 10 हजार रुपयांचे बक्षीस जाहिर करून पथकाचे अभिनंदन केले आहे.
