नंदुरबार – शहरातील भोणे फाटा परिसरात तात्पुरते तंबू (पाल) टाकून रहिवास करणाऱ्या परप्रांतीयांच्या एका झोपडीत बुधवार रोजी रात्री झालेल्या स्फोटाने मोठी खळबळ उडाली. घराच्या भिंती थरथरल्या इतका मोठा आवाज नेमका कशाच्या स्फोटाने आला? हा प्रश्न चर्चेत आला. तथापि फुग्याच्या गॅसशी संबंधित साहित्याचा स्फोट असल्याचा प्राथमिक अंदाज पोलिसांनी वर्तवला असून तज्ञ पथक त्यावर अधिक तपास करीत आहे.
घटनास्थळी सिलेंडर, कुकर अथवा तत्सम स्फोटजन्य वस्तूंचे अवशेष किंवा खुणा आढळून आलेल्या नाहीत त्यामुळे हे गौडबंगाल काय असावे? याचा शोध पोलीस घेत आहेत. प्राप्त झालेल्या प्राथमिक माहितीनुसार काल बुधवार दिनांक 17 जानेवारी 2024 रोजी रात्री 10:45 वाजेच्या सुमारास परिसर हादरवून सोडणारा आवाज ऐकून नगरपालिका घरकुल इमारत, वडार वसाहत, गांधीनगर, गोपाळ नगर, जयचंद नगर इतक्या सर्व भागातून तिथे लोक धावून आले. या घटनेत कापडी तंबू सारखी उभारलेली ती झोपडी (पाल) आणि त्यातील सामान उध्वस्त झालेले दिसले. या घटनेत दोन लहान मुली जायबंदी झाल्या असून त्यांची प्रकृती चिंताजनक असल्याचे सांगण्यात आले. स्फोटाचा दणका एवढा होता की झोपडीतील दहा वर्षीय मुलीचा एक हात तुटला तर लहान घ्या दुसऱ्या तान्ह्या कोवळ्या मुलीच्या डोक्याला गंभीर इजा झालेली पाहायला मिळाली, असे प्रत्यक्षदर्शींचे म्हणणे आहे. छोट्या बॉम्बस्फोटासारखा झालेला तो आवाज नेमका कसला होता? याचा उलगडा मात्र झालेला नाही. घटनास्थळी स्फोटाच्या कुठल्याही खुणा आढळून आलेल्या नाहीत.
तथापि, फुगे भरण्यासाठी वापरल्या जाणाऱ्या गॅसच्या साहित्याचा स्फोट असल्याचे प्रथमदर्शनी आढळले असून ज्या झोपडीत दुर्घटना घडली तो झोपडी मालक पुनमलाल भोसले याच्या विरोधात शहर पोलीस ठाण्यात गुन्हा नोंदवण्यात आला आहे; असे पोलिसांकडून सांगण्यात आले. पूनमलाल मध्य प्रदेशातील बिजूवेडी गावातील रहिवासी आहे. हा परिवार परप्रांतीय असून कालच 17 जानेवारी 2024 रोजी दुपारी तिथे राहायला आला होता आणि आल्यापासून त्यांचे जोरदार भांडण आपसात चालू होते असे भोवतालच्या रहिवाशांनी सांगितले. रुद्राक्ष माळा आणि तत्सम वस्तू विक्रीचे काम हा परिवार करतो.
दरम्यान, शहर पोलीस ठाण्याचे निरीक्षक निवृत्ती पवार, सहायक निरीक्षक नंदा पाटील आणि पथकाने रात्रीपासून सर्व स्थिती हाताळली. प्रकृती चिंताजनक असल्याने मुलींना सुरत येथे हलविण्यात आले. स्पोट नेमका कसला होता, याचा अधिक तपास करण्यासाठी तज्ञांचे स्वतंत्र पथक पाचारण करण्यात आले असल्याचे सूत्रांनी सांगितले.
