लुटमारीचे ‘डिजिटल’ मायाजाल; डिजिटल बँकिंगबाबत आरबीआयने जारी केल्या या खास सूचना

एकीकडे ऑनलाइन फसवणुकीच्या आणि आर्थिक लूटमारीच्या एकाहून एक सरस कहाण्या वाटाव्यात अशा धक्कादायक घटना रोज समोर येत आहेत. दोन दिवसांपूर्वीच झारखंड राज्यातील जामतारा येथे रसुलगड भागात तरुणांच्या एका टोळीला अटक करण्यात आली आहे. अवघे एकोणवीस-वीस वयोगटातील हे तरूण केवायसी अद्ययावत करून देण्याच्या नावाखाली बँकेचा तपशील मिळवून खातेदारांची फसवणूक करायचे. एक-दोन नव्हे तर 20 राज्यातील सुमारे 4 लाख 38 हजार हून अधिक खातेदारांची युपीआय, क्रेडिट कार्ड आणि इतर प्रकारची या टोळीने फसवणूक तथा लूट केली, असा दावा तपास पथकाने केला आहे. अमुक ॲप वर आभासी चलनात गुंतवणूक केल्यास महिनाभरात दहापट रक्कम परतावा मिळते; असे आमिष दाखवायचे आणि नंतर ॲप बंद करून गुंतवणुकीचा पैसा लाटायचा असेही अन्य घटनांमधून उघडकीस आले. बिटकॉइन सह विविध आभासी चलनात मोठा फायदा असल्याचे चित्र रंगवले जात आहे. परिणामी पैसे गुंतवणाऱ्यांचा ओढा तिकडे वाढला आहे. फेसबुक, इंस्टाग्राम आणि ॲप द्वारे अशा लोकांना जाळ्यात ओढले जाते. याप्रकारे फायदा घेऊन फसवणूक करणाऱ्या टोळ्या पाकिस्तानी सायबर गुन्हेगारांच्या हस्तक असल्याचे पोलीस तपासात निष्पन्न होत आहे. ओटीपी नंबर माहित करून परस्पर खात्यातून रक्कम हडपल्याच्या घटना तर मागील दहा वर्षात सर्वसामान्य झाल्या आहेत.