नंदुरबार (प्रतिनिधी) – जिल्ह्यातील प्रसिद्ध वक्ते, व्याख्याते, अभ्यासक तथा ग्राहक पंचायत महाराष्ट्रचे नाशिक विभागीय माजी अध्यक्ष मार्तंडराव व्यंकटेश जोशी यांचे बुधवार दि.24 नोव्हेंबर 2021 रोजी रात्री पुण्यात निधन झाले. गुरुवारी सायंकाळी ग्राहक पंचायत आणि महाराष्ट्र प्रदेश प्रवासी महासंघातर्फे सामुहिक श्रद्धांजली वाहण्यात आली. माणिक चौकातील दिगंबर जैन मंदिराच्या सभागृहात संपन्न झालेल्या या शोक सभेच्या प्रारंभी जेष्ठ सदस्य सुरेश जैन यांनी स्व.मार्तंडराव जोशी यांच्या प्रतिमेस पुष्पहार अर्पण केला. ऍड. मोहन बोडस यांनी स्व. मार्तंडराव जोशी यांच्या कार्याला उजाळा दिला. ते म्हणाले की, बाबा जोशी उत्तम वक्ता, लेखक, संघटक, शिक्षक आणि मार्गदर्शक असे पंचसूत्री लाभलेले बहुअंगी व्यक्तिमत्व होते. त्यांनी ग्राहक चळवळ राज्यभर रुजविली. ग्राहक पंचायत व महाराष्ट्र प्रदेश प्रवासी महासंघाचे तालुकाध्यक्ष महादू हिरणवाळे यांनी सभेचे सूत्रसंचालन केले. ऍड. निलेश देसाई, डॉ. गणेश ढोले, योगेश्वर जळगावकर, वैभव करवंदकर, नितीन पाटील, प्रसाद अर्थेकर, रघुनाथ अहिरे, आदींसह ग्राहक पंचायत आणि महाराष्ट्र प्रदेश प्रवासी महासंघाचे पदाधिकारी याप्रसंगी उपस्थित होते.
